– Ha, ishqilib, bola-chaqasining egiligini koʻrsin. Endi buyoqqa qara, oʻgʻri bolam, hademay tong ham yorishib qolar. Ana, yorugʻ yulduz ham tikkaga kelib qoldi. Oshxonaning yonidagi tutdan sirgʻalib pastga tush, oʻtinimiz yoʻq. Oshxonada bir zamonlar bogʻdan kelgan bir-ikkita yongʻoq toʻnka bor, boltani olib, shuning bir chekkasidan ozgina uchirib ber, qumgʻon qoʻyaman. Kecha togʻang berib ketgan zogʻoradan ikkitasini olib qoʻyganman, birgalashib choy ichamiz.